Chind, Frau, Hund
En Alltag

Am morge goni met em Hond, seit s‘Chend, ond denn goni i d’Schuel. Ond wenn i vo de Schuel chome, goni weder met em Hond ond denn goni weder i d’Schuel. Denn chomi hei, säge de Mueter Salü, esä met ere z’Nacht ond denn got sie met em Hond ond ech go goge schlofe. Am Morge goni denn weder met em Hond.

Am Morge goni go schaffe, seit d’Frau, ond wenn i am Obig vom Schaffe chome, sägi mim Chend Salü, mer ässed z’Nacht ond denn goni met em Hond ond denn goni goge schlofe. Am Morge goni denn weder go schaffe.

Am Morge goni met em Chend, seit de Hond, ond denn schlof i. Ond am Mittag goni weder met em Chend ond denn schlof i. Ond am Obig goni met de Frau ond denn schlof i weder. Ech wörd gärn emol elei go.