’o piccirillo, ’a fémmena, ’o cane
tutt’e juorne

’A matina porto ’o cane, dice ’o piccirillo, e po’ vaco ’a scòla. Quanno m’arritiro da scòla porto nata vota ’o cane e po’ vaco nata vota ’a scòla. Po’ torno ’a casa, saluto ’a mammà, magnamme ’nzieme e po’ essa porta ’o cane e je me vaco ’a cuccà. ’A matina appriesso porto nata vota ’o cane.

’A matina vaco ’a faticà, dice ’a fémmena, e quanno m’arritiro da fatica saluto ’o piccirillo mijo, po’ magnamme ’nzieme, po’ porto ’o cane e po’ me vaco ’a cuccà. ’A matina appriesso vaco nata vota ’a faticà.

’A matina vaco co’ piccirillo, dice ’o cane, e po’ m’addormo. A miezjuorne vaco nata vota co’ piccirillo e po’ m’addormo. ’A sera vaco ca’ fémmena e m’addormo nata vota. Pe’ na vota vulesse ì je solo.