Kind, Fraa, Hund
En Alldach

Moins laaf isch middem Hund, seeds Kind, und dann geh isch in die Schul. Und wenn isch aus de Schul komm, laaf isch widder middem Hund un dann geh isch widder in die Schul. Dann komm ich haam, sach Gude übber mei Mudder, ess middere zu Obend un dann leefd die middem Hund un isch lei mich ins Bedd. Moins laaf isch dann widder middem Hund.

Moins geh isch uff die Arwet, seed die Fraa, un wenn isch Obends von de Arwet kumm, sach ich Gude übber mei Kind un mir esse zu Obend un dann laaf isch middem Hund un dann lei isch mich ins Bedd. Moins geh isch dann widder uff die Arwet.

Moins laaf isch middem Kind, seed de Hund, und dann schlof isch. Un middachs laaf isch widder middem Kind und dann schlof isch. Un obends laaf isch middere Fraa und dann schloof isch widder. Isch ded gernemol allans laafe.